Kandidati i opozitës për Bashkinë e Rrogozhinës, Shkëlqim Hoxha ka falënderuar banorët e Rrogozhinës për votën e tyre pro opozitës në fushatën e zgjedhjeve lokale. Në një shënim në Facebook ai akuzon qeverinë për deformim të votës në këtë zonë. Kujtojmë se Hoxha humbi zgjedhjet vetëm pasi u numërua kutia e votimit e të burgosurve në burgun e Rrogozhinës.
POSTIMI I PLOTE:
Motra e vëllezër, banorë të Rrogozhinës, Lekajt, Kryevidhit, Gosës e Sinaballajt.
Miqtë e mi, bashkëpunëtorë e dashamirës!
Përulem me shumë mirënjohje e respekt para çdonjërit nga Ju!
Këto muaj të rrugëtimit tonë, kuptova e ndamë së bashku: shqetësimet, problemet dhe nisëm rrugën e përbashkët të kthimit të Pushtetit te Ju, pronarët e vërtetë të Bashkisë Rrogozhinë.
Ju votuat për ndryshimin, për ta ushtruar ju pushtetin, duke përbuzur e përballur njëkohësisht makinerinë e pushtetit, që bëri gjithçka, për të deformuar vullnetin tuaj.
Banorët e Rrogozhinës na votuan, na besuan përgjegjësinë e drejtimit të bashkisë.
Qeveria e Pushteti në mënyrë të paligjshme hartojnë lista me banorë ekstra, që nuk e ndjejnë përgjegjësinë e votës, e kështu tentojnë të tjetërsojnë fitoren.
Miqtë e mi, ka dhjetra arsye që beteja ligjore do kthejë hakun te ju!
