Ambasadorja e Shqipërisë në Greqi, Luela Hajdaraga pati takim me kryetarin e ri të bashkisë së Athinës, Haris Doukas, të cilit i uroi përzemërsisht shumë suksese në detyrën e re.
Duke qenë bashkia më e rëndësishme e vendit dhe njëkohësisht hapësira ku jetojnë, punojnë, studiojnë dhe zhvillojnë aktivitetin e tyre tregtar një numër i lartë i anëtarëve të komunitetit shqiptar në Greqi, ambasadorja Hajdaraga shprehu angazhimin në forcimin e bashkëpunimit, organizimin e aktiviteteve me interes të përbashkët si dhe rritjen e sensibilizimit të qytetarëve në dy vendet tona për çështjet e mjedisit, thuhet në një njoftim të Ambasadës shqiptare në Greqi.
Bashkia e Athinës i pason Bashkisë së Tiranës Presidencën e Rrjetit të Qyteteve të Ballkanit B40, nismës më të rëndësishme të bashkive nën moton “Një e ardhme më e mirë, një bashkëpunim më i mirë”, me kryefjalë bashkëpunimin rajonal në çështjet e klimës, qyteteve të zgjuara dhe transformimit digjital, demokracinë qytetare, migracionin, si dhe bashkëpunimin ekonomik.
Ky zhvillim do të shërbejë si një shtysë më e fortë që qytetarët e Tiranës dhe Athinës të njohin në mënyrë të ndërsjellë këto destinacione të bukura turistike dhe bukurinë e njerëzve që jetojnë në to./ata
