Anija “Lissus” dhe një ekip efektivësh të Forcës Detare do të jetë pjesë e operacioneve të përqendruara (FOCOPS) të NATO-s në detin Mesdhe.
Në ceremoninë e përcjelljes së ekuipazhit, zv.shefja e Shtabit të Përgjithshëm të FA gjeneralmajor Manushaqe Shehu u shpreh se me këtë mision, “Forca Detare rikthehet të kontribuojë si faktor i rritjes së sigurisë detare, pas një angazhimi të suksesshëm 3-vjeçar nga viti 2016-2019, në aktivitetin e NATO-s Sea Guardian në detin Egje, ku bëri të mundur dhënien e ndihmës për mbi 1800 persona, në rrezik për jetën”.
“Ky është një tregues i qartë për rolin e Shqipërisë si një faktor stabiliteti dhe sigurie në rajon dhe më gjerë. Ndryshe nga misioni i kryer në vitin 2016-2019 në detin Egje, që kishte karakter humanitar, kjo është hera e parë që Forca jonë Detare angazhohet në një operacion të mirëfilltë të rritjes së sigurisë detare”, u shpreh gjeneralmajor Manushaqe Shehu.
Më tej në fjalën e saj, zv.shefja e Shtabit të Përgjithshëm të FA u shpreh e bindur se efektivi i anijes do të tregojë profesionalizëm, përkushtim dhe korrektësi gjatë kryerjes së detyrave.
Në ceremoninë e përcjelljes së trupave morën pjesë edhe komandantë të forcave të ndryshme./ATSH
